Accueil du site / Evénements / Michel è-st-èvôye

Hommage à Michel Trussart

Ça faît qu’ nosse soçon Michel Trussart è-st-èvôye au Paradis dès Molons. À pates di tchèt. Sins pont fé d’ brût.

I nos laît tot cacames, nos-ôtes lès Rèlîs, cochoyus au d’là, astamburnés. Nos l’ vèyin.n´ voltî, nosse Michel. I n’èsteûve nin Rèlî maîs il èsteûve di nosse famile, vormint !Al difin do mwès d’ fèvri, il èsteûve co là po nosse Grand Raploû. Avou l’ samovâr dès Molons, co bin, qui sins li, nos n’aurin.n´ pont yeû d’ cafeu !

Combin d’ côps n’ nos-a-t-i nin v’nu dîre bondjoû su pîd su fotche, dins nosse locâl, quand nos-avin.n´ on raploû, quand onk ou l’ôte bouteûve al bibiotèque ou po tchanter L’ Bia Bouquèt avou d’s-èfants. Nin pace qu’il aureûve sitî cûrieûs, Michel, non.na, maîs pace qu’il aveûve bon avou nos-ôtes, èt todi sorîre.

Èt todi près´ à nos d’ner on côp di spale. Li robinèt qui coûreûve, li lènd’mwin, Michel ènn’aveûve mètu on novia. Li boton do tchaufadje qui toûrneûve sot, Michel aleûve qwé lès-ovrîs dèl Vile po-z-è r’mète on-ôte. Èt co l’ minme quand l’ tiyau aveûve pêrcé èt piède tote li tchaleûr… Sins rovî lès novèlès clés po l’ pwate à reuwe dèl maujone do Folklôre. Èt vos ’nn’auroz ! Tènoz, quî-ç’ qu’a sovint mètu nos satch di man.nèstés à reuwe lès londis al nét ? Quî-ç’ qui r’purdeûve avou li lès botèyes vûdes, lès cines dès Rèlîs (wêre maîs do bon !) oudôbin dèl Sicole di Walon ? Vos l’avoz bin compris ! C’èsteûve co todi nosse Michel qui nos lî v’lans dîre on fèl mèrci.

Sûr qu’il a r’trové li Nès´ Montellier, èt l’ Jean Galer qui sont-st-èto au Paradis, au Paradis dès Rèlîs, zèls. Deûs paradis èsconte di n-on l’ôte. One miète come dins nosse maujone do Dialecte et du Folklore, où-ç’qui lès Molons tchantenut au prumî plantchî, èt où-ç’ qui, nos-ôtes, lès Rèlîs, nos-èstans al valéye po spèpî lès bokèts qu’on-z-a scrît.

Michel, nos n’ vos-ètindrans pus cocheûre vosse chirlike dins lès reuwes di Nameur, nos n’ vos vièrans pus tchanter su l’ tchaur di Moncrabeau, ou djouwer è walon, su l’ sin.ne avou l’ Compagnîye Tine Briac. Maîs quand nos-ètindrans one miète di manôye qui clicote dins one chirlike, quand nos vièrans lès tchapias dès Molons qui r’glatichenut dins l’ solia, quand nos tchanterans L’ Bia Bouquèt, sûr qui nos sondjerans à vos. À r’veûy, Michel.

Po lès Rèlîs namurwès, Joseph DEWEZ